Şəxsən mənim üçün geyim tərzim həmişə əhvalıma təsir edən bir amil olub.
Yalnız ən son trendlərə uyğun, dəbdə olan geyimləri az qala vitrinə çıxar-çıxmaz alıb geyinən bir insan görəndə, çoxları onu cazibədar, mükəmməl və dəbli, izlənilə biləcək biri kimi qəbul edir.
Bununla belə, mən bunu nə tərz, nə də kimliyi ifadə edən bir şey kimi görürəm.
Bir insan bütün ən son moda trendlərini yaxşı zövqə sahib olduğu üçün və ya daxilən hiss etdiyi tərzinə uyğun bildiyi üçün geyinmir, yəni bu, yaxşı zövqün göstəricisi deyil. Mən buna sadəcə bir günlük göstəriş və ya şöhrət kimi yanaşıram.
Öz daxili zövqünüzdən və kimliyinizdən kənar bir şeyə etibar etməyə davam etsəniz, nəticə heç də həmişə müsbət olmaya bilər. Hər bir insanın fərdi enerjisi olmalıdır və trendə uyğun geyinmək arzusu ilə bu trendlərin içərisində özünüzü itirməməlisiniz. İçinizdəki “sən”i moda dünyası ilə qarışdırmağı bacarmaq lazımdır: bu, özünüzə sadiq qalmaqla bərabər, moda dünyasının bəxş etdiyi trendlərə uyğunlaşmağı balanslaşdırmaq deməkdir.
Həyat balansdan ibarətdir.
Siz moda tendensiyalarının ardınca gedə bilərsiniz, ancaq bunu özünüzü digərlərindən fərqləndirərək etmək lazımdır. Unutmayaq ki, hər yeni trend müxtəlif bədən quruluşları üçün nəzərdə tutulur. Sizə yaraşan, geyindikdə rahat hiss etdiyiniz və enerjinizi artıran geyimlərdən istifadə edin. Düşünürəm ki, başqalarının təyin etdiyi moda tərzini "geyinmək" üçün özümüzə məxsus tərzimizi bir kənarda buraxmamalıyıq. Hər birimiz bənzərsizik və mən məhz bunu zamansız tərz adlandırıram.
Ülviyyə Mahmud,
Baş redaktor
