Nargis Magazine nümayəndəsi qismində mən Dubay dəb həftəsi Yaz/Yay 2026 mövsümündə iştirak etdim və bir neçə günü yaradıcılıq, enerji və özünəməxsus dəb ilə dolu keçirdim. Podiumda həm artıq tanınmış dizaynerləri, həm də yeni istedadları görmək fürsəti qazandım – hər biri öz hekayəsini və ab-havasını nümayiş etdirirdi. Budur, mənim ən çox bəyəndiyim kolleksiyalardan bəziləri.
Jozeph Diarbakerli
Jozeph Diarbakerli Dubaydan həftəsində debütünü Hollivud üslubundan ilhamlanan güclü kolleksiya ilə etdi. Hər bir obraz kino ulduzlarına xas cazibə və özünəinam saçırdı: kəskin xətli kostyumlar, parlaq parçalar və cəsarətli siluetlər ön plana çıxırdı. Modellər bəzən zəngin varisləri, bəzən də dramatik ikonaları canlandıraraq kolleksiyanın zəngin xarakterini və emosional ruhunu nümayiş etdirdilər. Bu debüt Diarbakerlinin özünə inamı, dramı və dəbdəbəni birləşdirən yanaşmasını ortaya qoydu.
XD Xenia Design
Xorvatiyanın XD Xenia Design brendi də ilk dəfə olaraq Dubay dən həftəsində podiuma çıxdı. Onların Yaz/Yay 2026 kolleksiyası — The Art of Making Clothes (“Geyim hazırlamaq sənəti”) adlanırdı və memarlıq zərifliyini ön plana çəkirdi. Kolleksiya yaponların kintsugi sənətindən ilhamlanmışdı. Skulptural siluetlər, həcmli qollar, kəskin vurğulanmış bel xətti və şəffaf organzadan qatlar tikişləri və konstruksiyanı vizual poeziyaya çevirmişdi. Rəng palitrası əsasən qara və neytral tonlarda idi, dərin qırmızı və yaşıl çalarlarla tamamlanaraq təmiz, düşünülmüş və peşəkar işlənmiş bir estetika təqdim edirdi.
Benang Jarum
İndoneziyalı Benang Jarum brendi isə Yaz/Yay 2026 mövsümü üçün hazırladığı Opulent Bloom (“Təmtəraqlı Çiçəklənmə”) kolleksiyası ilə beynəlxalq podiuma geri döndü. Bu kolleksiya çiçək motivlərini sadəcə zəriflik rəmzi kimi deyil, güc və kimliyin cəsarətli bəyanatı kimi təqdim edirdi. Axıcı siluetlər, incə işləmələr və çiçəklərin ruhunu əks etdirən zəngin rəng palitrası kolleksiyanı həm zərif, həm də güclü qadınlığın təntənəsinə çevirdi. Beləliklə, brend yenidən öz müasir zərifliyini, inam və fərdiliyi vurğulayan güclü bəyanatla möhkəmləndirdi.
THAT Concept Store
THAT Concept Store Dubay dəb həftəsinə çoxmarkalı təqdimatı ilə qayıtdı. Podiumda müxtəlif üslublar nümayiş etdirildi: denim, oversayz formalar, parlaq rənglər və maraqlı teksturalar. Şou irəlilədikcə görünüşlər daha parlaq və bədənə oturan parçalarla əvəz olundu. Proqramda Hellessy, Christopher Esber, Khaite və Philosophy kimi markalar da yer aldı. Hər brend özünəməxsus ab-hava gətirsə də, ümumi axın bütövlüyünü qorudu. Yekunda Lujeyn Adada tərəfindən təqdim edilən parıltılı libas şouya möhtəşəm sonluq bəxş etdi.
Buttonscarves
Buttonscarves Dubai Fashion Week Yaz/Yay 2026 mövsümündə özünün zərif Lucent Dusk kolleksiyasını təqdim etdi. Bu, brendin Dubay podiumunda ikinci çıxışı idi. Kolleksiya yumşaq, təbii rəng çalarları və atlas, jakar, organza kimi yüksək keyfiyyətli parçalar üzərində qurulmuşdu; incə muncuq işləmələri ilə daha da zənginləşdirilmişdi. Ən diqqətçəkən məqam isə Nina, Mindy və Beverly adlı iri ölçülü çantaların təqdimatı oldu ki, bu da kolleksiyaya cəsarətli bir ifadə qatdı. İndoneziya səfirinin və Rawdah Mohamed-in tədbirdə iştirakı brendin modest fashion (örtülü dəb) sənayesində artan nüfuzunu daha da ön plana çıxardı.
FAD Institute of Luxury Fashion & Style
Gecəni FAD Institute of Luxury Fashion & Style bağladı. Onların təqdimatında 20-dən artıq gənc dizaynerin işləri nümayiş olundu. Kolleksiyalarda qeyri-adi kəsimlər, cəsarətli naxışlar və eksperimental yanaşmalar ön plana çıxır, modanın gələcək istiqamətlərini əks etdirirdi. Bəzi işlər irs və ənənələrə söykənirdi, bəziləri isə müasir siluetlər və parça innovasiyalarını araşdırırdı. FAD təşəbbüsü gənc dizaynerlərə dəstək verərək, onların moda sənayesinə inam və yaradıcılıqla qədəm qoymasına imkan yaratdı.
