Aprelin 23-də Fluxus Space məkanında Fransanın məşhur Lalique Evinin yeni dekorativ obyektlər kolleksiyasının təqdimatı keçirilib. Tədbir brend və onun Azərbaycandakı rəsmi distribütoru olan Italdizain şirkətinin birgə təşkilatçılığı ilə baş tutub.
Bakıda Lalique-in havaya həsr olunmuş yeni Air de Lalique kolleksiyası təqdim edilib. Bu kolleksiyada Lalique bədii ifadə baxımından ən mürəkkəb mövzulardan birinə – havaya müraciət edir. Havanı birbaşa təsvir etmək mümkün olmasa da, onun mahiyyəti forma, işıq, parçanın hərəkəti və kristalın incə işlənməsi vasitəsilə ifadə olunur.
Təqdimat aprelin 23-də Fluxus Space məkanında baş tutub. Axşam klassik məhsul nümayişi formatında deyil, kolleksiyanın ideyasını hər detalında əks etdirən vahid vizual konsepsiya əsasında qurulub. Yarımşəffaf parçalar, zərif drapirlər, işıq vurğuları və məkan həlləri havanın hərəkəti hissini birbaşa dekorasiya ilə deyil, işarələr, ritm və teksturaların dəyişimi vasitəsilə çatdırıb. Səsləndirmə və xüsusi hazırlanmış aromatik kompozisiyalar bu atmosferi tamamlayaraq onu uçuş, açıq məkan və yaradıcı ilham mövzuları ilə üzvi şəkildə əlaqələndirib.
Qonaqlar məkana daxil olan kimi zalın divarlarında nümayiş etdirilən Lalique eskizləri ilə qarşılaşırdılar. Bu eskizlər təqdimata bədii kontekst qazandıraraq diqqəti hazır məhsuldan onun yaranma prosesinə, xəttə, ideyaya və sənətkarın əl hərəkətinin ifadəsinə yönəldirdi. Axşam proqramına həmçinin axıcı parçalarla müşayiət olunan rəqqasənin performansı da daxil idi. Müəllif kokteylləri isə tədbirin konsepsiyasını davam etdirərək hava ünsürü mövzusunu daha da zənginləşdirirdi.
Birinci zalın əsas vizual mərkəzi drapirlə örtülmüş dairəvi masa idi. Burada Air de Lalique kolleksiyasının ən önəmli nümunələri nümayiş etdirilirdi. İkinci zalda isə Lalique vazaları xüsusi floristik kompozisiyalarla birlikdə təqdim olunurdu. Eyni məkanda dəvət olunmuş xəttat fəaliyyət göstərirdi – o, kolleksiyanın rəng palitrasına uyğun hazırlanmış kağız yelpiklərin üzərində qonaqlar üçün fərdi yazılar və kalliqrafik kompozisiyalar yaradırdı.
Air de Lalique: hava bədii obraz kimi
2026-cı ildə Lalique təbiət ünsürlərinin tədqiqini davam etdirərək diqqətini havaya yönəldir. Hərəkətdə, işığın dəyişməsində və formanın hiss olunmayacaq qədər incə transformasiyasında mövcud olan ünsürə. Air de Lalique kolleksiyasında bu ideya kristalın dili ilə ifadə olunur: şəffaflıq, relyef, drapirə edilmiş xətlər və səthin işıqla qarşılıqlı təsiri vasitəsilə.
Kolleksiya Lalique Evi üçün mühüm olan təbiət mövzusunu inkişaf etdirsə də, bunu birbaşa istinadlara müraciət etmədən həyata keçirir. Burada hava sadəcə fon deyil, müstəqil bədii obraza çevrilir. Onun varlığı əşyaların plastik həllində, hərəkət hissində və kristalın işığa verdiyi reaksiyada özünü göstərir.
Kolleksiyanın rəng palitrası şəffaf kristal, mərcan çalarlarında patina və əl ilə tətbiq olunan çəhrayı yarpaq qızılı üzərində qurulub. Bu tonlar günbatımının dəyişkən işığına, həmçinin rəng, parıltı və əks olunmalar vasitəsilə havanın demək olar ki, görünən hala gəldiyi məqama istinad edir.
Kolleksiyanın əsas nümunələri
Alizé vazaları
Alizé vazalarının heykəltəraşlıq üslubunda işlənmiş xətləri yüksək modadakı plisə və drapirə elementlərini xatırladır. Səthin relyefi hərəkət hissi yaradır — sanki forma küləyin təsiri altında dəyişir və axıcılıq qazanır.
Yarpaq qızılı ilə işlənmiş versiyalar müxtəlif ölçülərdə təqdim olunur: kiçik dekorativ əşyalardan başlayaraq interyerdə diqqət mərkəzinə çevrilən iri ölçülü vurğu elementlərinədək.
Alizé kasası
Alizé kasasının açıq forması eyni plastik və axıcı motivi davam etdirir. Üç kristal dayaq elementi vizual olaraq əşyanı yuxarı qaldıraraq ona yüngül yüksəliş və hərəkət hissi bəxş edir. Kristalın əyrilərindən keçən işıq səthin ritmini vurğulayır və bu obyekti kompozisiyanın müstəqil mərkəzinə çevirir.
Piou-Piou
Piou-Piou fiqurları havanın və uçuşun ən aydın simvollarından biri olan quş obrazına müraciət edir. Onların siluetləri bir neçə dəqiq xəttə endirilib: gövdənin əyriliyi, qanad, dimdik və poza. Bu lakonik yanaşmaya baxmayaraq, fiqurlar öz xarakterini, hərəkət dinamikasını və azadlıq hissini qoruyub saxlayır.
Air de Lalique kolleksiyasının bütün nümunələri Lalique-in bədii və kreativ direktoru Marc Larminaux tərəfindən Lalique Creative Studio ilə əməkdaşlıq çərçivəsində hazırlanıb. Kolleksiya René Lalique irsi ilə dialoqu davam etdirərək təbiət motivlərinin müasir əşya dizaynında necə yenidən şərh oluna biləcəyini nümayiş etdirir.
Air de Lalique hərəkət, işıq və kristalın adətən görünməz qalan məqamları ifadə etmək qabiliyyəti haqqında kolleksiyadır. Burada hava bədii ifadə vasitəsinə çevrilir, hər bir əşya isə təbiət, sənətkarlıq və forma haqqında daha geniş hekayənin bir hissəsi olur.
